მეტი ენერგოეფექტურობა — ნაკლები კომუნალური გადასახადი

ენერგორესურსებზე გაზრდილი ტარიფების პირობებში სტუმრებისთვის კვლავინდებურად კომფორტული საცხოვრებლის შეთავაზება, ზოგიერთ შემთხვევაში, ძვირი ჯდება. მასპინძლებს, რა თქმა უნდა, შეუძლიათ, სთხოვონ სტუმრებს, გონივრულად მოიხმარონ გათბობის/გაგრილების სისტემა ან წყალი, თუმცა მხოლოდ ამის იმედად ვერ იქნებით. კომუნალური გადასახადები რომ შეიმციროთ, უმჯობესია, თუ საცხოვრებლის ენერგოეფექტურობის ამაღლებაზე იზრუნებთ. ეს არა მხოლოდ მნიშვნელოვნად დაგიზოგავთ თანხას, არამედ ჩვენი პლანეტის დაცვასაც შეუწყობს ხელს.

ამ კუთხით ქმედითი რჩევები და საინტერესო რესურსები რომ მოგაწოდოთ, Airbnb მდგრადი განვითარების სხვადასხვა ექსპერტთან თანამშრომლობს. დასაწყისისთვის გთავაზობთ რჩევებს Energy Saving Trust‑ისგან, გაერთიანებულ სამეფოში მოღვაწე ორგანიზაციისგან, რომლის სპეციალიზაციაც ენერგომოხმარებისა და სათბურის ეფექტის მქონე აირების გამოყოფის შემცირებაზე ზრუნვაა.

სტუმრები, როგორც წესი, ელიან, რომ საცხოვრებელში ტემპერატურის გაკონტროლების საშუალება ექნებათ და ცხელი წყალი დახვდებათ. ამ კუთხით მათი საჭიროებების დაკმაყოფილება (მაქსიმალურად ნაკლები დანახარჯით) შეგიძლიათ საცხოვრებლის თბოიზოლაციის გაუმჯობესებისა და წყლის მოხმარების ოპტიმიზაციით.

• თუ ფანჯრების, კარების, გამწოვების, მილების გარშემო არსებული ნაპრალებისა და როზეტების ჰერმეტიზაციაზე იზრუნებთ, თავიდან აიცილებთ ოთახში ცივი ჰაერის შემოპარებას და არც სითბო გავა გარეთ — ეს ნებისმიერი ტიპის საცხოვრებელში ენერგიის დაზოგვის შედარებით იაფი და ეფექტური ხერხია. ამაში დაგეხმარებათ, მაგალითად, საიზოლაციო ლენტები, ჰერმეტიკები, პოროლონის შუასადებები, დასახვევი ჟალუზები და სქელი ფარდები ან სპეციალური სადებები შტორებისთვის.
• სითბოს შესანარჩუნებლად წყლის ძველი გამაცხელებლების თბოიზოლაცია და ტაიმერის დამონტაჟება (საცხოვრებელში არყოფნისას წყლის გამაცხელებლის გასათიშად) დაგეხმარებათ ენერგორესურსების დაზოგვაში.
• დაამონტაჟეთ მოწყობილობები, რომლებიც ეკონომიურად მოიხმარს წყალს, მაგალითად, თანამედროვე სარქვლები უნიტაზებისთვის, ონკანები და შხაპები. აერაციის მქონე თავები შხაპისთვის ჰაერისა და წყლის შერევით ინარჩუნებს მაღალ წნევას, რისი დამსახურებითაც სტუმრები ნაკლებ წყალს ხარჯავენ შხაპის მიღებისას (ეკონომია შეადგენს 16 ლიტრამდე ყოველ ჯერზე). ამასთან, რეგულარულად შეამოწმეთ ყველა მოწყობილობა, გაჟონვები დროულად რომ აღმოფხვრათ.
• სარეცხი მანქანის/საშრობის (მათ შორის, ჭურჭლის) მაქსიმალურად გავსება და დაბალ ტემპერატურაზე ან „ეკო რეჟიმზე“ დაყენება ხელს შეუწყობს როგორც წყლის, ისე ელექტროენერგიის დაზოგვას. საცხოვრებლის მომდევნო სტუმრისთვის მომზადებისას, შეეცადეთ, ჭურჭელი და სარეცხი ჰაერზე გააშროთ.

ანა, სუპერმასპინძელი და მრჩეველ მასპინძელთა საბჭოს წევრი ნიუგალიდან (უელსი), თავისი კოტეჯების თბოიზოლაციაზე დეკორატიული ელემენტების მეშვეობით ზრუნავს. „ქვის იატაკზე ხალიჩები დავაგეთ, ფანჯრებზე კი სქელი ფარდები დავკიდეთ, ჰაერს რომ არ აპარებდეს“, — გვიყვება ანა, რომელიც მასპინძელთა საბჭოს მდგრადი განვითარების კომიტეტში შედის, და დასძენს: „ამ ტიპის დეკორატიული ელემენტები ლამაზადაც გამოიყურება და ენერგორესურსების დაზოგვაშიც გვეხმარება“.

კარგად აღჭურვილი სამზარეულოსა და საიმედო Wi‑Fi ქსელის მსგავსი საყოფაცხოვრებო პირობები ბევრ სტუმარს სჭირდება. ამასთან, ელექტროენერგიის მოხმარების შემცირებაც შეგიძლიათ იმგვარად, რომ ეს სტუმრების კომფორტზე არ აისახოს.

• ჩაანაცვლეთ ვარვარისა და ჰალოგენის ნათურები LED‑ნათურებით. თითოეული ნათურა დაგაზოგვინებთ წელიწადში 4$‑დან 16$‑მდე.
• მოძრაობის სენსორებისა და განათების მართვის საშუალებების დამონტაჟება მარტივი და შედარებით იაფია, თანაც ზუსტად გეცოდინებათ, რომ შუქი შემთხვევით მთელი ღამე ჩართული არ დარჩება — მაგალითად, სენსორები ავტომატურად ჩართავს და გამორთავს განათებას მოძრავი ობიექტის დაფიქსირებისას.
• იყიდეთ თანამედროვე მსხვილი ტექნიკა მოძველებულის ნაცვლად. ახალი მოდელები ნაკლებ ელექტროენერგიას მოიხმარს. მაგალითად, ენერგოეფექტურობის კუთხით მაღალი კლასის მაცივარი საგრძნობლად მეტი თანხის დაზოგვაში დაგეხმარებათ თავისი საექსპლუატაციო ვადის განმავლობაში.
• გამოაერთეთ ქსელიდან წვრილი საყოფაცხოვრებო მოწყობილობები (მათ შორის, ტელეფონის დამტენები), ისინი უმნიშვნელოდ — მაგრამ მაინც — მოიხმარს ელექტროენერგიას. ალტერნატივის სახით, გამოიყენეთ მაშტოებელი ჩანგალი ან ჭკვიანი ჩამრთველი, რომელიც შეგიძლიათ დისტანციურად გათიშოთ, როცა საცხოვრებელში არავინ იმყოფება. თუ მოწყობილობები ქსელთან მიერთებული და მუდმივად მოლოდინის რეჟიმში არ გექნებათ, ელექტროენერგიაზე დაახლოებით 5%‑ს დაზოგავთ თვეში.

„დალაგებისას უამრავი წვრილმანი გროვდება“, — ამბობს ანა და დასძენს: „ელექტროენერგიისა და წყლის დასაზოგად ენერგოეფექტურობის კუთხით მაღალი კლასის სარეცხ მანქანასა და საშრობს ვიყენებ“.

აუცილებლად აღნიშნეთ საცხოვრებლის აღწერილობაში ის წვლილი, რომელიც გარემოს დაცვაში შეგაქვთ, რომ მომავალმა სტუმრებმაც შეგიწყონ ამაში ხელი.

„ვფიქრობ, ძალიან მნიშვნელოვანია, განცხადებებში იგრძნობოდეს ეკოლოგიური მდგრადობისადმი ჩვენი სწრაფვა“, — აღნიშნავს ანა და დასძენს: „მიუთითეთ, როგორ ზრუნავთ გარემოზე და აუცილებლად გეწვევიან სტუმრები, რომლებიც იზიარებენ თქვენს ფასეულობებს“.

იყავით გულწრფელი სტუმრებთან კომუნიკაციისას და ისინი მიიღებენ თამაშის თქვენეულ წესებს. „რა თქმა უნდა, გვსურს, რომ სტუმრობა კომფორტული და სასიამოვნო იყოს, თუმცა განცხადებაში მკაფიოდ გვაქვს აღნიშნული ის, თუ როგორ ვცდილობთ, ეკონომიურად მოვიხმაროთ ენერგორესურსები. ვიმედოვნებთ, რომ სტუმრები გონივრულად მოიქცევიან, ანუ, მაგალითად, არ გავლენ სახლიდან მთელი დღით ისე, რომ გათბობა ჩართული დატოვონ“, — ამბობს ანა.

წინამდებარე სტატიაში საცხოვრებლის ენერგოეფექტურობის ამაღლების მხოლოდ რამდენიმე მარტივი ხერხი განვიხილეთ. რაც უფრო სერიოზული იქნება ცვლილებები, მით მეტ ელექტროენერგიას დაზოგავთ — მაგალითად, მზის პანელების დამონტაჟების, ფანჯრების შეცვლის ან საგულდაგულო თბოიზოლაციის მეშვეობით. ამასთან, გირჩევთ, გაარკვიოთ, ხომ არ გეკუთვნით მსგავსი პროექტებისთვის ფასდაკლებები, საგადასახადო შეღავათები ან სხვა ტიპის წახალისებები.

შეიტყვეთ ვრცლად ეკოლოგიური პასუხისმგებლობით მასპინძლობის შესახებ