სტუმრების რაოდენობის საკითხის გადაწყვეტის შესახებ
ერთ‑ერთი პირველი, რაც პოტენციურ სტუმრებს აინტერესებთ ხოლმე, საცხოვრებლის ზომაა. თუ ტევადობას, ასევე, საწოლების, საძინებლებისა და სააბაზანოების რაოდენობას ზუსტად მიუთითებთ, სტუმრობის მსურველებს არჩევანის გაკეთებას გაუმარტივებთ.
განცხადების გამოქვეყნების შემდეგ მეტი დეტალის დაზუსტებას შეძლებთ. მაგალითად, საშუალება გექნებათ, მიუთითოთ, რა ტიპის საწოლებს სთავაზობთ სტუმრებს ან დახვდებათ თუ არა საძინებელში ისეთი საყოფაცხოვრებო პირობები, როგორიცაა საკიდები და დამატებითი ბალიშები. ამ ეტაპზე კი დაფიქრდით, რამდენი სტუმრის განთავსება გსურთ საცხოვრებელში.
თუ ზუსტად არ იცით, დაიხმარეთ ჩვენი რჩევები:
- დაითვალეთ საწოლების რაოდენობა საცხოვრებელში. გაითვალისწინეთ, რამდენი ადამიანი შეძლებს თითოეულზე კომფორტულად მოთავსებას.
- დაითვალეთ სააბაზანოების რაოდენობა. გაითვალისწინეთ, რამდენი ადამიანი შეძლებს მათ გამოყენებას ერთმანეთისთვის ხელის შეშლის გარეშე.
- მიუთითეთ სტუმრების ის მაქსიმალური რაოდენობა, რომელიც დისკომფორტს არ გიქმნით. თქვენ არ ხართ ვალდებული, ზუსტად იმდენ ადამიანს უმასპინძლოთ, რამდენსაც საცხოვრებელში განთავსება შეუძლია.
- ნუ დაახვედრებთ უსიამოვნო სიურპრიზებს სტუმრებს. თუ საწოლ ადგილებად თვლით დივნებს, ფუტონებს, გასაბერ ლეიბებს ან სტანდარტული საწოლისგან განსხვავებულ სხვა ვარიანტებს, აუცილებლად აღნიშნეთ ეს მომდევნო ეტაპებზე, მაგალითად, განცხადების აღწერილობაში ან ფოტოების წარწერებზე. კარგი იქნება, თუ იმასაც მიუთითებთ, არის თუ არა საცხოვრებელში ჩვილის საწოლი ან ორსართულიანი საწოლი მოაჯირებით.
- ეცადეთ, წინასწარ არაფერი დაასკვნათ. მაგალითად, თუ ორი ადამიანი გსტუმრობთ, ეს სულაც არ ნიშნავს, რომ ერთად აპირებენ ძილს.
როცა ყველაფერი მზად გექნებათ, „პლუსისა“ და „მინუსის“ ღილაკების მეშვეობით დააწესეთ სტუმრების მაქსიმალური დასაშვები რაოდენობა და მიუთითეთ რამდენი საწოლი, საძინებელი და სააბაზანოა საცხოვრებელში. შეგიძლიათ, სველ წერტილად მონიშნოთ ტუალეტიც, რომელსაც აქვს უნიტაზი და ხელსაბანი, მაგრამ არ აქვს საშხაპე ან აბაზანა.
დაბოლოს, გახსოვდეთ, რომ ინფორმაციის შეცვლა ნებისმიერ დროს შეგიძლიათ — მათ შორის, საწოლების და დაშვებული სტუმრების რაოდენობის განახლება — თუ ვითარება ან საჭიროებები შეგეცვლებათ.