რჩევები ადაპტირებული პირობების საჭიროების მქონე სტუმრების მასპინძლობისთვის

Airbnb‑თი მოსარგებლე მრავალ სტუმარს ადაპტირებულობის კუთხით სპეციფიკური საჭიროებები აქვს. მაგალითად, გადაადგილების შეზღუდვის მქონე პირებს, რომლებიც ყავარჯენს ან ეტლებს იყენებენ, ჯავშნის გაფორმებამდე სურთ, იცოდნენ, რამდენად შესაფერისია მათთვის თქვენ მიერ შეთავაზებული საცხოვრებელი.

სტუმრობის მსურველები ხშირად ფილტრავენ განცხადებებს ადაპტირებული პირობების მიხედვით. აქედან გამომდინარე, ამ ტიპის პირობების წარმოჩენის შემთხვევაში, თქვენი განცხადება უფრო ხშირად მოხვდება ძიების შედეგებში, რაც, თავის მხრივ, გაზრდის ჯავშნების მიღების ალბათობას.

Airbnb‑ზე უკვე დავამატეთ კატეგორია „ადაპტირებული“. მასში თავმოყრილია ეტლით მოსარგებლეთათვის შესაფერისი საცხოვრებლები, რომელთა შესასვლელამდეც უსაფეხურო ბილიკია, შიგნით კი მინიმუმ ერთი საძინებელი და სააბაზანოა. თუ სტუმრებს ადაპტირებულ პირობებს სთავაზობთ, აუცილებლად მიუთითეთ განცხადებაში. კრიტერიუმების დაკმაყოფილების შემთხვევაში, შესაძლოა, ის ახალ კატეგორიაში მოხვდეს.

ზემოთ მოცემულ ვიდეოში ტელეწამყვანი და შეზღუდული შესაძლებლობების მქონე პირთა უფლებების დამცველი, სოფი მორგანი, გვიყვება, როგორ დაიწყო მასპინძლობა Airbnb‑ს მეშვეობით, რადგან სურდა, განსაკუთრებული საჭიროებების გათვალისწინებით მომზადებული თავისი საცხოვრებელი სხვებისთვის შეეთავაზებინა. „ბევრი ვიშრომე, რომ ჩემთვის ადაპტირებული საყოფაცხოვრებო პირობები მომეწყო“, — აღნიშნავს ის და დასძენს: „ძალიან მსურს, ის სხვებსაც გავუზიარო, რადგან ვიცი, რომ ბევრისთვის, განსაკუთრებით, შშმ პირებისთვის, იდეალური ვარიანტი იქნება“.

სოფის კარგად ესმის, რომ ადაპტირებული პირობების საჭიროების მქონე სტუმრებისთვის მოგზაურობა ზოგჯერ მარტივი არ არის, მაგრამ მას მსოფლიოს მონახულების იმდენად დიდი სურვილი აქვს, რომ დაბრკოლებებს არ უშინდება. „უკვე დაახლოებით 19 წელია, რაც ეტლით ვსარგებლობ. მსოფლიო არ არის იდეალურად მოწყობილი შშმ პირებისთვის, მაგრამ მოგზაურობა მაინც ღირს“, — ამბობს ის.

ქვემოთ გთავაზობთ რამდენიმე რჩევას ადაპტირებული პირობების საჭიროების მქონე სტუმრებისთვის კომფორტული პირობების შესაქმნელად.

სტუმრობის მეტი მსურველის ყურადღება რომ მიიქციოთ, შესთავაზეთ მათ ადაპტირებული პირობები, მაგალითად:

• ადაპტირებული საპარკინგე ადგილი
• განათება შესასვლელისკენ მიმავალ გზაზე
• უსაფეხურო ბილიკი სტუმრების შესასვლელამდე
• სტუმრების უსაფეხურო შესასვლელი
• უსაფეხურო შესასვლელები ოთახებში
• მინიმუმ 82 სმ სიგანის შესასვლელები
• უსაფეხურო საშხაპე
• ხელის მოსაჭიდი მილები უნიტაზთან ან/და საშხაპეში
• საშხაპის ან აბაზანის სკამი
• ჭერის ან მობილური ამწე
• აუზის ამწე

შეიტყვეთ ვრცლად განცხადებაში ადაპტირებული პირობების მითითების შესახებ

ზემოთ მოცემულ ვიდეოში სოფი მასპინძლებს ურჩევს, შეძლებისდაგვარად მეტი ფოტო დაამატონ სტუმრობის მსურველებისთვის, რომლებსაც ადაპტირებული პირობები სჭირდებათ. ამგვარად, მათ უკეთესი წარმოდგენა შეექმნებათ იმის შესახებ, თუ რამდენად შესაფერისია მათთვის თქვენ მიერ შეთავაზებული საცხოვრებელი.

მასპინძლებს ვურჩევთ, ფოტოებს წარწერებიც დაურთონ. მაგალითად, თუ ფოტოზე ნაჩვენებია სააბაზანო, რომელშიც ხელის მოსაჭიდი ფიქსირებული მილებია, შეგიძლიათ წარწერაში მიუთითოთ, რომ ის ერთადერთი ადაპტირებული სააბაზანოა საცხოვრებელში.

სტუმრობის მსურველებს საცხოვრებლის შესახებ წარმოდგენა მარტივად რომ შეუქმნათ, გადაიღეთ ფოტოები სხვადასხვა რაკურსით. მაგალითად, თუ მათ ადაპტირებულ საპარკინგე ადგილს სთავაზობთ, ფოტოები ისე გადაიღეთ, რომ შეიძლებოდეს იმის გარჩევა, თუ სად მდებარეობს საპარკინგე ადგილი საცხოვრებელთან მიმართებაში.

განცხადებაში ადაპტირებული პირობების განთავსებამდე მოწმდება, რამდენად შეესაბამება ისინი Airbnb‑ს მითითებებს ფოტოებთან დაკავშირებით. თუ სტუმრებისთვის შეთავაზებული ადაპტირებული პირობა ფოტოზე მკაფიოდ არ იქნება ნაჩვენები, ახალი ფოტოს ატვირთვას ან შესაბამისი პირობის განცხადებიდან წაშლას გთხოვთ.

შეიტყვეთ ვრცლად ფოტოებზე ადაპტირებული პირობების ასახვის შესახებ

თუ სტუმრობის მსურველი ადაპტირებული პირობების თაობაზე მოგმართავთ, დასვით რამდენიმე შეკითხვა ჯავშნის გაფორმებამდე, რომ ის უკეთ მიხვდეს, რამდენად შეეფერება მას თქვენ მიერ შეთავაზებული საცხოვრებელი.

საუბარი შეგიძლიათ დაიწყოთ ისეთი ფრაზებით, როგორიცაა, მაგალითად:

• საცხოვრებელთან დაკავშირებით რამე კონკრეტულად ხომ არ გაინტერესებთ?
• მეტი კომფორტისთვის რაიმე ხომ არ გჭირდებათ?

ადაპტირებული პირობების საჭიროების მქონე სტუმრის დაბინავებამდე დაფიქრდით, სხვა რა გაუმარტივებს მას საცხოვრებელში გადაადგილებას. მაგალითად, შეგიძლიათ:

• ავეჯის (სკამებისა და მაგიდების) გადაადგილება, საცხოვრებელ სივრცეებში გასასვლელების გასაფართოებლად
• როზეტებზე წვდომის გამარტივება
• საყოფაცხოვრებო ნივთების (მაგ., პირსახოცებისა თუ თეფშების) დალაგება უფრო ხელმისაწვდომ ადგილებზე

შეიტყვეთ, როგორ აქციოთ საცხოვრებელი უფრო ადაპტირებულად

გზამკვლევის მეშვეობით შეგიძლიათ სტუმრებს ადგილობრივების რჩევები გაუზიაროთ, განსაკუთრებული სტუმართმოყვარეობა აგრძნობინოთ და ქალაქი ახლოს გააცნოთ. რესტორნების, ღირსშესანიშნაობებისა თუ გარე აქტივობების რეკომენდებისას არ დაგავიწყდეთ ადაპტირებული პირობების საჭიროების მქონე ადამიანებიც.

მაგალითად, აღნიშნეთ პანდუსების მქონე რესტორნები, საფეხმავლო ბილიკები მყარი საფარით და საზოგადოებრივი ტრანსპორტი. თუ ამ რჩევებს გაითვალისწინებთ, თქვენი განცხადებით მეტ ადამიანს დააინტერესებთ.