7 რჩევა კრიზისგამოვლილი ადამიანების მასპინძლობისთვის

თუ Airbnb‑ს მეშვეობით უკვე გიმასპინძლიათ, ალბათ, არაერთი საათიც გაგიტარებიათ იმაზე ფიქრით, როგორ შეგექმნათ სტუმრებისთვის შინაურული გარემო.

Airbnb.org‑ის შემთხვევაში კი, როცა რთულ ვითარებაში აღმოჩენილ ადამიანებს სთავაზობთ დროებით საცხოვრებელს, იმაზეც ღირს დაფიქრება, რომ სტუმრობის მსურველებმა გარკვეული ტრავმა გადაიტანეს.

მათ, ვისაც სახლ‑კარის დატოვება და უსაფრთხო ადგილის ძიება უწევს, თანაც ზოგჯერ — სრულიად მოუმზადებლად, შესაძლოა, სულ სხვა საკითხები აღელვებდეს, ვიდრე დამსვენებლებს. ეს ერთ‑ერთი მიზეზია, რატომაც Airbnb.org თანამშრომლობს არაკომერციულ ორგანიზაციებთან, რომლებიც მუშაობენ კონფლიქტური თუ სტიქიური ზონებიდან იძულებით გადაადგილებულ პირებთან და სტუმრობისას მათ ზოგჯერ კომპლექსურ დახმარებას უჩენენ კიდეც.

ამასთან, Airbnb.org‑იც სთავაზობს მასპინძლებსა და სტუმრებს საგანგებოდ მომზადებული სპეციალისტებით დაკომპლექტებულ მხარდაჭერის გუნდს, რომელიც მზადაა, დაგეხმაროთ რთული პრობლემების მოგვარებაში თქვენი ეროვნების, რასის, ეთნიკური წარმომავლობისა თუ იდენტობის განურჩევლად.

ტრავმაგადატანილი ოჯახებისთვის კომფორტული და უსაფრთხო საცხოვრებელი, სადაც პირადი სივრცე ექნებათ, ფასდაუდებელია — სახლებიდან წამოსვლის შემდეგ მრავალ მათგანს ხომ არც სამზარეულოთი სარგებლობა შეეძლო და არც მისაღებ ოთახში ერთად მოკალათება?!

სტუმრობის მსურველებს თავი უფრო შინაურად რომ აგრძნობინოთ, გაითვალისწინეთ შემდეგი:

• შექმენით სითბოსა და კომფორტის ატმოსფერო საცხოვრებელში — ეს სტუმრებს სათანადოდ მოსვენებაში დაეხმარება. დაახვედრეთ მათ სუფთა პირსახოცები და საწოლის თეთრეული, ასევე, ძირითადი ნივთები სააბაზანოსა თუ სამზარეულოში, რომ თავი ისე აგრძნობინოთ, როგორც საკუთარ სახლში, თუნდაც ისინი სულ რამდენიმე დღით გსტუმრობდნენ.

• ზოგიერთ სტუმარს, შესაძლოა, პირადი უსაფრთხოების საკითხი აღელვებდეს. აქედან გამომდინარე, შეეცადეთ, საცხოვრებელთან მისასვლელი გზები და შესასვლელები კარგად განათებული იყოს. შეამოწმეთ, რომ საკეტები და ფარდა‑ჟალუზები არ არის დაზიანებული. წინასწარ აცნობეთ სტუმრებს მოსალოდნელი ხმაურის შესახებ, მაგალითად, თუ საცხოვრებლის თავზე თვითმფრინავები დაფრინავს ან ნაგავი შესაბამისი სამსახურების თანამშრომლებს დილით ადრე გააქვთ.

• ზოგიერთ მათგანს, ვისაც ტრავმა გადააქვს და ახალ გარემოსთან შეგუება უწევს, შესაძლოა, პრობლემა ჰქონდეს გარკვეული ინფორმაციის დამახსოვრებასთან. „საღად ვერ აზროვნებ და ზოგიერთი რამ, უბრალოდ, არ გესმის“, — გვიზიარებს ერთ‑ერთი სტუმარი, რომელსაც კალიფორნიაში მძვინვარე მასშტაბური ხანძრების დროს მოუწია ევაკუაცია, და დასძენს: „იმდენად გთრგუნავს, რომ რაღაც მომენტში არც კი იცი, როგორ გააკეთო ელემენტარული რაღაცები, თითქოს, ითიშები“. ამ შემთხვევაში შეგიძლიათ მიმართოთ ვიზუალურ დამხმარე საშუალებებს სტუმრებისთვის. მაგალითად, ამოუბეჭდოთ ფურცელი, რომელზეც მოცემული იქნება საცხოვრებლის მისამართი და უბნის რუკა.

• თუ თქვენ და სტუმრები სხვადასხვა ენაზე საუბრობთ, მიმართეთ ადგილობრივ არაკომერციულ ორგანიზაციებს ან სხვა დაწესებულებებს, რომლებიც, შესაძლოა, გთავაზობდნენ სასარგებლო ინფორმაციას თქვენი სტუმრებისთვის გასაგებ ენაზე. თუ სტუმრებს მიმაგრებული ჰყავთ სოცმუშაკი Airbnb.org‑ის ერთ‑ერთი პარტნიორი არაკომერციული ორგანიზაციიდან, დახმარება, შესაძლოა, მასაც შეეძლოს.

მრავალ მასპინძელს თავიანთ საქმეში ერთ‑ერთ ყველაზე დიდ სიამოვნებას ახალი ნაცნობობები ჰგვრის, თუმცა როცა ურთიერთობთ სტუმრებთან, რომლებსაც, შესაძლოა, ტრავმა ახალი გადატანილი ჰქონდეთ, რამდენიმე ნიუანსი უნდა გაითვალისწინოთ.

• გამჭვირვალობა და თანმიმდევრულობა უაღრესად მნიშვნელოვანია. წინასწარ შეატყობინეთ სტუმრებს, თუ მათთან ხელოსანი უნდა მივიდეს ან თავად აპირებთ ვიზიტს.

• სტუმრებთან საუბრისას მოერიდეთ კრიზისული სიტუაციების განხილვას — შემოიფარგლეთ საყოფაცხოვრებო საკითხებით. მერი, რომელსაც უკრაინიდან იძულებით გადაადგილებული რამდენიმე სტუმარი ჰყავდა, გვიყვება, რომ მათ ზოგად შეკითხვებს უსვამდა (მაგალითად, იმის შესახებ, თუ საიდან ჩამოვიდნენ და როგორ იმგზავრეს). მერის თქმით, სტუმრები თავად მოგიყვებიან, რა გადაიტანეს, თუ ამის სურვილი ექნებათ. მთავარია, პატივი სცეთ სტუმრების პირად სივრცეს, რომ მათ ძალების სათანადოდ აღდგენა შეძლონ.

• დააკვირდით, როგორ ურჩევნიათ სტუმრებს თქვენთან კომუნიკაცია. მაგალითად, შესაძლოა, ზოგიერთი მათგანი თავისი ოჯახური წრის შიგნით ურთიერთობით შემოიფარგლოს, ზოგი კი მეტად გახსნილი იყოს კონტაქტისთვის და მეზობლების გაცნობაც გთხოვოთ.

გმადლობთ გულისხმიერებისთვის, თქვენი დროისთვის და საცხოვრებლის შესათავაზებლად მზაობისთვის. თუ რთულ ვითარებაში აღმოჩენილი ადამიანების მასპინძლობასთან დაკავშირებით დამატებითი ინფორმაცია გჭირდებათ, დაიხმარეთ Airbnb.org‑ის ფარგლებში მასპინძლობის გზამკვლევი რესურსების ცენტრში, რომელშიც სხვადასხვა სტატია და ვიდეორგოლია თავმოყრილი.